विजडम कोचिङ क्रिकेट टिम ९ विकेटले विजयी

मलंगवा,०२ चैत । सर्लाहीको मलंगवामा जारी खुल्ला टि–ट्वन्टी क्रिकेट प्रतियोगिताको छैठौं खेलमा विजडम कोचिङ क्रिकेट टिम ९ विकेटले विजयी भएको छ । दुर्गा पुजा समिति जिल्ला विकास चोकले मलंगवा १० स्थित तिनबिघे मैदानमा आयोजना गरेको खेलमा ढाका बोर्डर क्रिकेट टिमलाई विजडमले ९ विकेटले हराएको आयोजक समिति सदस्य समिर मिकरानीले जानकारी दिएका छन् । टस जितेर व्याटिङ गरेका ढाका बोर्डरले निर्धारित २० ओभरमा ९ विकेट गुमाउँदै १ सय २५ रन बनाएका थिए । २९ रनमै ४ विकेट गुमाएका ढाका बोर्डरलाई सम्मान जनक स्कोर दिलाउनका लागि संजय सिंहले सर्वाधिक रन बनाएका थिए । सिंहले ३३ बलमा ४२ रन बनाउँदै टिमलाई १ सय २५ सम्म पूर्याएका थिए । ढाका बोर्डरलाई १ सय २५ मै सिमित राख्ने क्रममा विजडमका नेहमत खानले ३ विकेट हात पारेका थिए । १ सय २५ रनको लक्ष्य पच्छयाउन आएका विजडमले ८.२ ओभरमा १ विकेट गुमाउँदै लक्ष्य पुरा गरेका थिए । भारतीय खेलाडीले भरिएका विजडमले सुरुवातदेखि नै चौका छक्का लगाएका थिए । विजडमका लागि रंजित कुमारले २५ बलमा ६६ रन बनाएर नट आउट रहेका थिए । रंजितले ६ छक्का र ७ चौका प्रहार गरेका थिए । ढाका बोर्डरका लागि एक मात्र विकेट रुपेश सिंहले लिएका थिए । खेलको म्यान अफ द म्याच रंजित कुमारलाई प्रदान गरिएको थियो । रंजितले ६६ रन बनाउनुको साथै २ विकेट समेत लिएका थिए । रंजितलाई आयोजक समितिका कोषाध्यक्ष साजन जयवालले म्यान अफ द म्याचको ट्रफि प्रदान गरेका थिए । भोलिको खेल सर्लाही एकेडेमी मलंगवा र सिसौटिया क्रिकेट टिम हुने आयोजक समितिका सदस्य समिर मिकरानीले जानकारी दिएका छन् । प्रतियोगिताको विजेतालाई नगद रु एक लाख र उपविजेतालाई नगद रु ५० हजार प्रदान गरिने छ ।