स्वास्थ्य कार्यक्रमहरुको जिल्ला स्तरीय वार्षिक समीक्षा गोष्ठी समपन्न

सर्लाही,२४ कात्तिक । आर्थिक वर्ष २०८१।०८२ को सम्पादित स्वास्थ्य कार्यक्रमहरुको दुई दिने जिल्लास्तरीय वार्षिक समीक्षा गोष्ठी आज समपन्न भएको छ । स्वास्थ्य कार्यालय सर्लाहीले आयोजना गरेको समीक्षा गोष्ठीमा जिल्लाका २० पालिकाहरुले वर्ष दिनमा संचालन गरेको स्वास्थ्य सम्बन्धी क्रियाकलापसम्बन्धी प्रस्तुतिकरण गरीएको छ । स्वास्थ्य कार्यालयका प्रमुख डा.नबलकिशोर झाको अध्यक्षतामा भएको उद्घाटन सत्रमा मधेशप्रदेशका स्वास्थ्य तथा जनसख्ंया मन्त्रालयका सचिव डा.ओम अर्याल, स्वास्थ्य निर्देशनालयका निर्देशक सरोजचन्द्र न्यौपाने,तालिमकेन्द्रका प्रमुख डा.राजिव झा लगायतका सहभागी रहेका थिए ।

स्वास्थ्य सचिव डा. अर्यालले स्वास्थ्य क्षेत्रको सुधारका लागि कर्मचारीको मनोबल बढाउनुपर्नेमा जोड दिनुका साथै स्वास्थ्यकर्मीहरुको मनोवल खसाउने कार्य नगर्न सबैमा आग्रह गरे । अझै केही पालिकाहरुले अहिलेसम्म तलब खुवाउन सकेको छैन, उनले भने–तलब नै नपाएपछि स्वास्थ्यकर्मीको मनोवलमा कस्तो प्रभाव पर्छ ? सबैभन्दा बढी खट्ने स्वास्थ्यकर्मीहरुको मनोबल बढाउने कार्यमा सबै पक्षले सहयोग गर्नुपर्ने धारणा उनको थियो ।

दुई दिने जिल्लास्तरीय वार्षिक समीक्षा गोष्ठीका अध्यक्षता गर्नुभएका स्वास्थ्य कार्यलय प्रमुख झाले स्वास्थ्यकर्मीहरुले विपरीत परिस्थितिमा पनि सेवामा खटिने गरेकाले उनीहरुको मनोवलमा नकारात्मक प्रभाव पर्ने कार्य नगर्न सबैमा आग्रह गरे । यस दुई दिने जिल्लास्तरीय वार्षिक समीक्षा गोष्ठीमा उत्कृष्ट स्वास्थ्य कार्यक्रमहरु सम्पादन गरी ए प्लस ल्याउने पाँच ओटा पालिकालाई प्रमाणपत्र दिई सम्मान गरीएको छ । उत्कृष्ट कार्यसम्पादन गर्ने पालिकाहरुमा लालबन्दी नगरपालिका,विष्णु गाउँपालिका,हरिपुर नगरपालिका,हरिवन नगरपालिका र बसबरीया गाउँपालिका रहेका छन ।