मधेस प्रदेश : मुख्यमन्त्रीका लागि जसपाले आज दाबी पेस गर्ने

धनुषा, २६ पुस । मधेस प्रदेशको मुख्यमन्त्रीका लागि जनता समाजवादी पार्टी (जसपा) ले आज दाबी पेस गर्ने भएको छ । जसपा दलको नेता चयनकै कारण प्रदेश सरकार गठनको प्रक्रिया रोकिएको थियो । सोमवार दलको नेतामा सरोज यादव चयन भइसकेकाले अब दाबी पेस गरिने छ । मधेस प्रदेशको मुख्यमन्त्री जसपाको कोटामा परेकाले आउँदो मुख्यमन्त्री सरोज नै हुने जसपाले जनाएको छ । जसपा मधेस प्रदेशका अध्यक्ष रामबाबु यादवले प्रदेश प्रमुखले दिएको अन्तिम समय अगावै मुख्यमन्त्रीको दाबी प्रस्तुत गर्ने बताउनु भयो । सरकार गठनका लागि मधेस प्रदेशमा १६ जना सभासदसहित तेस्रो वरियतामा रहेको जसपालाई नेकपा माओवादीको २३ जना सभासद, जनमत पार्टीको १३ जना सभासद, माओवादी केन्द्रका ८ जना सभासद , राष्ट्रिय प्रजातन्त्र पार्टी र उन्मुक्ति पार्टीका १र१ जनासहित कुल ६० जना सभासदको समर्थन रहने अध्यक्ष यादवले जनाउनुभयो । मधेस प्रदेशमा कुल १ सय ७ सभासद रहेका छन् । मुख्यमन्त्रीको शपथ ग्रहण पुस २९ गते हुने उहाँले बताउनु भयो । प्रदेश प्रमुखले पुस २८ गतेभित्र २ वा त्यसभन्दा बढी दल मिलेर सरकार बनाउन आह्वान गरेका छन् । मन्त्रीमण्डल गठनबारे टुङ्गो लागि नसकेको उल्लेख गर्दै उहाँले मुख्यमन्त्रीको शपथ ग्रहणमा केही मन्त्रीहरुको पनि शपथ हुने बताउनु भएको छ । त्यसका लागि प्रयास भइरहेको उहाँले बताउनु भयो ।