मलंगवा नगरपालिकाको छैटौ नगरसभा उदघाटनसत्र शुरु, प्रस्तावित बजेट ५५ करोड ४३ लाख ७२ हजार

सर्लाही,१० असार । मलंगवा नगरपालिकाको छैटौ नगरसभा बुधबार मलंगवामा सुरु भएको छ ।मलगंवा नगरपालिकाले आर्थिक वर्ष २०७७÷७८ को लागि ५५ करोड ४३ लाख ७२ हजारको बजेट प्रस्ताव गरेको छ । संघीय सांसद नागेन्द्र कुमारले उदघाटन तथा नगर प्रमुख निरसल साहले अध्यक्षता गर्नु भएको नगरसभाले कोभिड—१९ ले आर्थिक, सामाजिक तथा स्वास्थ्य क्षेत्रमा पारेको संकटबाट पार पाउन स्थानीय स्तरमैं रोजगारीका अवसर सिर्जना गर्नु, सरकारी स्वास्थ्य संस्थालाई सुदृढ बनाउनु, कृषि उत्पादनमा आत्मनिर्भर बन्नु अहिलेको अपरिहार्य आवश्यकतालाई सम्बोधन गरेको छ । बजेट सार्वजनिकपछि नगरसभामा बोल्दै नगरप्रमुख नीरसल साहले क्रमागत आयोजनाको निर्माण पूरा गर्ने, लगानीको वातावरण सिर्जना गर्ने, कृषि, स्वास्थ्य, शिक्षामा लगानी बढाई नगरबासीमा परिवर्तनको अनुभूति गराउने र असल शासन प्रवर्द्धन गरि स्थानीय सेवा प्रवाह प्रभावकारी बनाउने योजना रहेको गरी बजेट आएको बताए । आ.व २०७७(०७८ मा यस नगरपालिकाको कोभिड १९ को संक्रमण लगायतका महामारी र विपदबाट नागरिकको जीवन जीवन रक्षा गर्दै जनजिवनलाई सहज र सुरक्षित बनाउने,उपलब्ध श्रोत साधन ,क्षमता र अवसरको उच्चतम परिचालन गरि रोजगारीको अवसर श्रृजना गर्दै आर्थिक विकासको गतिलाई निरन्तरता दिने,चालु आ.व का अधुरा वार्षिक योजना तथा कार्यक्रमहरुलाई निरन्तरता दिई सम्पन्न गर्ने,दिगो विकास लक्ष्य प्राप्तिका लागि आवश्यक कार्य गर्ने,सामाजिक ,आर्थिक र पुर्वाधार विकास मार्फत नगरवासीहरुको जीवनस्तर माथि उठाउने ,संघ र प्रदेश सरकारसँग समन्वय र सहकार्यलाई जोड दिने र असल शासन प्रवर्द्धन गरि स्थानीय सेवा प्रवाह प्रभावकारी बनाउने योजना रहेको नगरपालिकाका सुचना अधिकृत राजकुमार अधिकारीले जानकारी गराउनुभएको छ । नगरसभामा प्रस्ताव गरिएका ऐनहरु सभामा छलफल गरी पारित गर्ने कार्यक्रम रहेको प्रमुख प्रशासकीय अधिकृत होमनाथ सुवेदीले बताउनुभयो ।